ଆୟକର ବିଭାଗ ପୂର୍ବତନ ଏଆଇଡିଏମକେ ନେତା ତଥା ତାମିଲ ନାଡ଼ୁର ପୂର୍ବତନ ମୁଖ୍ୟମନ୍ତ୍ରୀ ଜୟଲଳିତାଙ୍କ ସହଯୋଗୀ ବି କେ ଶଶିକଳାଙ୍କ ୧୬୦୦ କୋଟିର ବେନାମୀ ସମ୍ପତ୍ତିକୁ ଜବତ କରିଛି । ଅଧିକାରୀଙ୍କ ତରଫରୁ ସ୍ପଷ୍ଟ କରାଯାଇଛିଯେ ୨୦୧୬ ମସିହା ନଭେମ୍ବର ମାସ ୮ ତାରିଖରେ କେନ୍ଦ୍ର ସରକାରଙ୍କ ଦ୍ୱାରା ବିମୁଦ୍ରିକାରଣ ଘୋଷଣା ହେବା ପରେ ଶଶିକଳା ଚେନ୍ନାଇ, ପୁଡୁଚେରୀ, କୋଏମ୍ବାଟୁର ଭଳି ବିଭିନ୍ନ ସ୍ଥାନ ମାନଙ୍କରେ ବହୁ ସମ୍ପତ୍ତି କିଣିଥିଲେ । ସୂତ୍ରରୁ ପ୍ରକାଶକି ନୋଟବନ୍ଦୀ ସମୟରେ ଶଶିକଳା କାଳ୍ପନିକ ନାଁରେ ପ୍ରାୟ ୧୫୦୦ କୋଟି ଟଙ୍କାର ସମ୍ପତ୍ତି କିଣିଥିଲେ । ୨୦୧୭ ମସିହାରେ ଆୟକର ବିଭାଗ ‘ଅପରେସନ କ୍ଲିନ’ ନାମରେ ବିଭିନ୍ନ ଠିକଣା ଗୁଡିକରେ ଚଢ଼ାଉ କରିଥିଲେ । ଏହି ସମୟରେ ହିଁ ଏହି ବେନାମୀ ସମ୍ପତ୍ତି ଗୁଡିକ ବିଷୟରେ ଜଣା ପଡିଥିଲା । ଅଧିକାରୀ ମାନେ ଏ ନେଇ ଶଶିକଳାଙ୍କୁ ପଚରାଉଚରା ମଧ୍ୟ କରିଥିଲେ । ଜୟ ଲଳିତାଙ୍କ ମୃତ୍ୟୁ ପରେ ଶଶିକଳା କିଛି ଦିନ ପାଇଁ ଏଆଇଡିଏମକେ ପାର୍ଟିର ନେତୃତ୍ୱ ନେଇଥିଲେ । କିନ୍ତୁ ପରେ ପଲାନିସ୍ଵାମୀ ନେତୃତ୍ୱଧୀନ ସରକାର ତାଙ୍କୁ ପାର୍ଟିରୁ ବହିଷ୍କାର କରିଥିଲେ । କିନ୍ତୁ ବର୍ତ୍ତମାନ ଶଶିକଳାଙ୍କ ସହ ତାଙ୍କ ପରିବାର ସଦସ୍ୟ ଇଲାଭରସି ଓ ସୁଧାକରଣ ମଧ୍ୟ ଦୁର୍ନୀତି ଅଭିଯୋଗରେ ୪ ବର୍ଷର କାରାଦଣ୍ଡ ଭୋଗୁଛନ୍ତି ।