ପୂର୍ବ ପ୍ରଧାନମନ୍ତ୍ରୀ ମନମୋହନ ସିଂହଙ୍କୁ ଡେଙ୍ଗୁ, ଜାଣନ୍ତୁ ଏବେ କେମିତି ଅଛି ସ୍ୱାସ୍ଥ୍ୟାବସ୍ଥା
ପୂର୍ବ ପ୍ରଧାନମନ୍ତ୍ରୀ ମନମୋହନ ସିଂହଙ୍କୁ ଡେଙ୍ଗୁ। ସେ ଡେଙ୍ଗୁରେ ପୀଡ଼ିତ ଥିବା ନେଇ ଯାଞ୍ଚ ପରେ ଜଣାପଡ଼ିଛି। କିନ୍ତୁ ତାଙ୍କ ସ୍ୱାସ୍ଥ୍ୟାବସ୍ଥାରେ ଧୀରେ ଧୀରେ ସୁଧାର ଆସୁଛି। ଡାକ୍ତରଙ୍କ କହିବାନୁସାରେ, ଏବେ ସେ ବିପଦମୁକ୍ତ ଅଛନ୍ତି। ଏମ୍ସ ଅଧିକାରୀଙ୍କ ସୂଚନା ମୁତାବକ, ପୂର୍ବ ପ୍ରଧାନମନ୍ତ୍ରୀଙ୍କ ପ୍ଲେଟଲେଟ୍ସ ବଢ଼ୁଛି ଓ ଏବେ ସେ ବିପଦମୁକ୍ତ ଅଛନ୍ତି।
କଂଗ୍ରେସର ବରିଷ୍ଠ ନେତା ମନମୋହନ ସିଂହଙ୍କୁ ଜ୍ୱର ହେବା ସହ ସେ ଦୁର୍ବଳ ହୋଇଯାଇଥିଲେ। ଏଣୁ ବୁଧବାର ଦିନ ସନ୍ଧ୍ୟାରେ ତାଙ୍କୁ ଦିଲ୍ଲୀ ଏମ୍ସରେ ଭର୍ତ୍ତି କରାଯାଇଥିଲା। ମନମୋହନ ସିଂହ ହସ୍ପିଟାଲରେ ଭର୍ତ୍ତି ହେବା ଖବର ପାଇବା ପରେ ବଡ଼ ବଡ଼ ନେତା ମନ୍ତ୍ରୀ ତାଙ୍କୁ ଭେଟିବାକୁ ହସ୍ପିଟାଲରେ ପହଞ୍ଚିଥିଲେ। ତାଙ୍କ ସ୍ୱାସ୍ଥ୍ୟାବସ୍ଥା ସମ୍ପର୍କରେ ବୁଝିବାକୁ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ମନସୁଖ ମାଣ୍ଡବିଆ ମଧ୍ୟ ଏମ୍ସ ଯାଇଥିଲେ।
ଜଣାଶୁଣା ହୃଦରୋଗ ବିଶେଷଜ୍ଞ ନୀତିଶ ନାୟକଙ୍କ ତତ୍ତ୍ୱାବଧାନରେ ଡାକ୍ତରୀ ଟିମ୍ ପୂର୍ବ ପ୍ରଧାନମନ୍ତ୍ରୀଙ୍କ ଚିକିତ୍ସା କରୁଛନ୍ତି। ତାଙ୍କୁ ୩ ଦିନ ପୂର୍ବରୁ ଜ୍ୱର ଆସିଥିଲା ଓ ଧୀରେ ଧୀରେ ସେ ଦୁର୍ବଳ ହୋଇପଡ଼ିଥିଲେ। ପରେ ତାଙ୍କୁ ଏମ୍ସରେ ଭର୍ତ୍ତି କରାଯାଇଥିଲା। ସୂଚନାଯୋଗ୍ୟ ଯେ ଚଳିତବର୍ଷ ଏପ୍ରିଲରେ କରୋନା ମହାମାରୀର ଦ୍ୱିତୀୟ ଲହର ବେଳେ ମଧ୍ୟ ମନମୋହନ ସିଂହ କରୋନାରେ ପୀଡ଼ିତ ହୋଇଥିଲେ। ସେତେବେଳେ ସ୍ୱାସ୍ଥ୍ୟାବସ୍ଥା ବିଗିଡ଼ିବାରୁ ତାଙ୍କୁ ଏମ୍ସରେ ଭର୍ତ୍ତି କରାଯାଇଥିଲା। କିନ୍ତୁ କିଛି ଦିନ ପରେ ସେ ସୁସ୍ଥ ହୋଇ ଘରକୁ ଫେରିଥିଲେ।
