ମୋଗଲ ସମ୍ରାଟ ଶାହାଜାହାନଙ୍କ ତ୍ରିଦିବସୀୟ ଉର୍ସ ଉତ୍ସବ ଚଳିତଥର ମାର୍ଚ୍ଚ ୨୧ରୁ ମାର୍ଚ୍ଚ ୨୩ ପର୍ଯ୍ୟନ୍ତ ପାଳିତ ହେବ। ଏ ଅବସରରେ ପର୍ଯ୍ୟଟକମାନେ ତିନି ଦିନ ମାଗଣାରେ ତାଜମହଲ ବୁଲିବା ସୁଯୋଗ ପାଇବେ। ଏହି ତିନି ଦିନ ପର୍ଯ୍ୟଟକଙ୍କ ପାଇଁ ପ୍ରବେଶ ନିଃଶୁଳ୍କ ରହିବ। ୨୧ ଓ ୨୨ ମାର୍ଚ୍ଚରେ ଅପରାହ୍ନ ୨ଟା ପରେ ତାଜ୍ରେ ମାଗଣାରେ ପ୍ରବେଶ କରିପାରିବେ। ସେହିପରି ମାର୍ଚ୍ଚ ୨୩ ତାରିଖରେ ପୂରା ଦିନ ତାଜ୍ ଦେଖିବାର ସୁଯୋଗ ମିଳିବ।
ଏଥିସହ ତାଜମହଲ ଭିତରେ ଥିବା ଶାହାଜାହାନ ଓ ମମତାଜଙ୍କ ପ୍ରକୃତ କବରକୁ ମଧ୍ୟ ପର୍ଯ୍ୟଟକ ଅତି ନିକଟରୁ ଦେଖିପାରିବେ। ଉର୍ସର ମୁଖ୍ୟ ଆକର୍ଷଣ ସବୁବର୍ଷ ଭଳି ସର୍ବଧର୍ମ ସଦ୍ଭାବର ପ୍ରତୀକ ସତରଙ୍ଗୀ ଚାଦର ରହିବ। ଶାହାଜାହାନ ଉର୍ସ କମିଟିର ଅଧ୍ୟକ୍ଷ ତାହିରୁଦ୍ଦିନ ତାହିର ଏନେଇ ସୂଚନା ଦେଇଛନ୍ତି।
ଉର୍ସର ଅର୍ଥ ହେଉଛି ‘କାହାର ପୁଣ୍ୟତିଥିରେ ପାଳନ କରାଯାଉଥିବା ଉତ୍ସବ’ ବା ଶ୍ରାଦ୍ଧବାର୍ଷିକୀ। ଏହି ଦିନ ଶାହାଜାହାନ ଓ ମମତାଜଙ୍କ ଭୂମିଗତ କକ୍ଷରେ ଥିବା ଅସଲି କବରକୁ ଖୋଲାଯିବ। ବର୍ଷକରେ ଏହି ଗୋଟିଏ ଦିନ ସାଧାରଣ ଲୋକଙ୍କ ସାମ୍ନାରେ କବର ଖୋଲାଯାଏ। କବର ଖୋଲାଯିବା ପରେ ଅଜାନ ହୁଏ ଓ ଫତିହା ପଢ଼ାଯାଏ। ଯାହାକୁ ଦେଖିବାକୁ ତାଜ୍ରେ ଲକ୍ଷ ଲକ୍ଷ ଜନସମାଗମ ହୋଇଥାଏ।