ଲଘୁଚାପ ପ୍ରଭାବରେ ବାଲିଗୁଡ଼ାରେ ଲାଗି ରହିଛି ମୁଷଳଧାରରେ ବର୍ଷା, ବସ୍ ଷ୍ଟାଣ୍ଡ ନିକଟ ରାସ୍ତା ଉପରେ ୪ ଫୁଟର ପାଣି

ବାଲିଗୁଡ଼ା(କେନ୍ୟୁଜ୍): ଲଘୁଚାପ ପ୍ରଭାବରେ ବାଲିଗୁଡ଼ାରେ ପ୍ରବଳ ବର୍ଷା । ମଧ୍ୟ ରାତ୍ରିରୁ ସହରରେ ମୁଷଳଧାର ବର୍ଷା ଲାଗି ରହିଛି । ବାଲିଗୁଡା ବସ ଷ୍ଟାଣ୍ଡ ନିକଟରେ ରାସ୍ତା ଉପରେ ୪ ଫୁଟ ପାଣି ପ୍ରବାହିତ । ବାଲିଗୁଡାରୁ ବୁଡ଼ାଗୁଡ଼ା ରାସ୍ତାରେ ଗାଡି ଚଳାଚଳ ବନ୍ଦ । କଦଳୀ ବନ୍ଧରେ ପାଣି ଫୁଲିବା ଓ ଉପର ମୁଣ୍ଡରୁ ବର୍ଷା ଜଳ ପ୍ରବାହିତ ଦ୍ୱାରା ରାସ୍ତା ଉପରେ ଲହଡ଼ି ମାରୁଛି ପାଣି । ନୂଆସାହି, ସୁନାପାଙ୍ଗା ସମେତ ବିଭିନ୍ନ ସାହିରେ ମଧ୍ୟ ରାସ୍ତା ଉପରେ ବର୍ଷାଜଳ ପ୍ରବାହିତ ହେଉଛି ।

ସୂଚନା ଥାଉକି, ଆସୁଛି ବଡ଼ ବର୍ଷା । ଉତ୍ତର-ପଶ୍ଚିମ କେନ୍ଦ୍ରୀୟ ବଙ୍ଗୋପସାଗର ଅଞ୍ଚଳରେ ସକ୍ରିୟ ରହିଛି ଲଘୁଚାପ । ଆଜି ଏହା ଉତ୍ତରପଶ୍ଚିମ ଦିଗରେ ଓଡ଼ିଶା ଉପକୂଳ ମୁହାଁ ହେବ । ଅଧିକ ଘନୀଭୂତ ହେବ ଲଘୁଚାପ । ରାଜ୍ୟର ଆଭ୍ୟନ୍ତରୀଣ ଭାଗରେ ଏହାର ପ୍ରଭାବ ଲାଗି ରହିଛି । ବିଭିନ୍ନ ସ୍ଥାନରେ ହୋଇଛି ବର୍ଷା । ଆହୁରି ୨ ଦିନ ଲଘୁଚାପ ବର୍ଷାରେ ଭିଜିବ ଓଡ଼ିଶା । ଆଜି ପଶ୍ଚିମ ଓଡ଼ିଶାର କିଛି ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ହେବ । ଏଥିପାଇଁ ୯ ଜିଲ୍ଲା ସୁନ୍ଦରଗଡ଼, ଝାରସୁଗୁଡ଼ା, ଦେବଗଡ଼, ସମ୍ବଲପୁର, ବରଗଡ଼, ସୋନପୁର, ବୌଦ୍ଧ, ବଲାଙ୍ଗିର ଓ ଅନୁଗୋଳକୁ ଅରେଞ୍ଜ ଓ୍ଵାର୍ଣ୍ଣିଂ ଜାରି ହୋଇଛି ।

ଏସବୁ ଜିଲ୍ଲାର କିଛି ସ୍ଥାନରେ ପ୍ରବଳରୁ ଅତି ପ୍ରବଳ ବର୍ଷା ହେବ । ସେହିପରି ୮ ଜିଲ୍ଲାକୁ ଜାରି ହୋଇଛି ୟେଲୋ ଓ୍ଵାର୍ଣ୍ଣିଂ । ଆସନ୍ତାକାଲି ପାଇଁ ଝାରସୁଗୁଡ଼ା ଓ ବରଗଡ଼ ଜିଲ୍ଲାକୁ ଅରେଞ୍ଜ ଓ୍ଵାର୍ଣ୍ଣିଂ ଓ ୫ ଜିଲ୍ଲାକୁ ୟେଲୋ ସତର୍କତା ଦେଇଛି ଆଞ୍ଚଳିକ ପାଣିପାଗ କେନ୍ଦ୍ରି । ବର୍ତ୍ତମାନ ସୁଦ୍ଧା ମୌସୁମୀ ସିଜିନରେ ରାଜ୍ୟରେ ସ୍ୱାଭାବିକଠାରୁ ଅଧିକ ବର୍ଷା ହୋଇଛି । ଜୁନ୍‌ ୧ରୁ ଆଜି ସୁଦ୍ଧା ମୋଟ୍‌ ୧୧୧୮.୨ ମିଲିମିଟର ବର୍ଷା ହୋଇଛି । ଯାହାକି ସ୍ୱାଭାବିକ ବର୍ଷାର ୧୦୮୪.୨ ମିଲିମିଟରଠାରୁ ୩ ପ୍ରତିଶତ ଅଧିକ ।

Leave A Reply

Your email address will not be published.