ଉନ୍ମୋଚିତ ହେଲା ମାସିକ ପାରିବାରିକ ପତ୍ରିକା କାଦମ୍ବିନୀର ନଭେମ୍ବର ସଂଖ୍ୟା
ଭୁବନେଶ୍ୱର(କେନ୍ୟୁଜ୍): ମାସିକ ପାରିବାରିକ ପତ୍ରିକା କାଦମ୍ବିନୀର ଚଳିତ ନଭେମ୍ବର ସଂଖ୍ୟା ଶନିବାର ଉନ୍ମୋଚିତ ହୋଇଯାଇଛି। କାଦମ୍ବିନୀର ଏହି ସଦ୍ୟ ସଂସ୍କରଣର ପ୍ରଚ୍ଛଦ ପୃଷ୍ଠାରେ ସ୍ଥାନ ପାଇଥିବା ଭାରତୀୟ ହକି ଦଳର ପ୍ରାକ୍ତନ ଅଧିନାୟକ ପଦ୍ମଶ୍ରୀ ଦିଲିପ ତିର୍କୀ, ଅନ୍ତର୍ଜାତୀୟ ଖ୍ୟାତି ସମ୍ପନ୍ନ ବାଲୁକା ଶିଳ୍ପୀ ପଦ୍ମଶ୍ରୀ ସୁଦର୍ଶନ ପଟ୍ଟନାୟକ, ଅନ୍ତର୍ଜାତୀୟ ଖ୍ୟାତି ସମ୍ପନ୍ନ ଓଡ଼ିଶୀ ନୃତ୍ୟଗୁରୁ ରତିକାନ୍ତ ମହାପାତ୍ର ଏଥିରେ ଅତିଥି ଭାବେ ଯୋଗଦେଇ କାଦମ୍ବିନୀ ଓ କୁନିକଥାର ସଦ୍ୟତମ ସଂଖ୍ୟାକୁ ଉନ୍ମୋଚନ କରିଥିଲେ। କାଦମ୍ବିନୀର ଏହି ଭିନ୍ନ ପ୍ରୟାସକୁ ସ୍ୱାଗତ କରି ଶ୍ରୀ ତିର୍କୀ କହିଲେ, କାଦମ୍ବିନୀ ସର୍ବଦା ଓଡ଼ିଶାର କଳାକାର ଓ ଅନ୍ୟାନ୍ୟ ବିଶିଷ୍ଟ ବ୍ୟକ୍ତି ବିଶେଷଙ୍କୁ କାଦମ୍ବିନୀ ପ୍ରଚ୍ଛଦରେ ସ୍ଥାନୀତ କରୁଛି ।
ଏହା ଏକ ପ୍ରଶଂସନୀୟ ଉଦ୍ୟମ। ଏଥି ପାଇଁ ସେ କାଦମ୍ବିନୀକୁ ଧନ୍ୟବାଦ ଜଣାଇଥିଲେ। ସୁଦର୍ଶନ ପଟ୍ଟନାୟକ ମଧ୍ୟ କାଦମ୍ବିନୀର ଏହି ପଦକ୍ଷେପକୁ ସାଧୁବାଦ ଜଣାଇବା ସହ ଓଡ଼ିଶା ଓ ଓଡ଼ିଆଙ୍କ ପ୍ରତି କାଦମ୍ବିନୀର ପ୍ରତିଷ୍ଠାତା ଅଚ୍ୟୁତ ସାମନ୍ତଙ୍କର ଯେଉଁ ଶ୍ରଦ୍ଧା ଓ ଆତ୍ମୀୟତା ରହିଛି ସେଥିପାଇଁ ସେ ଶ୍ରୀ ସାମନ୍ତଙ୍କୁ ଧନ୍ୟବାଦ ଦେଇଥିଲେ। ଏହାକୁ ପାଥେୟ କରି କାଦମ୍ବିନୀ ମଧ୍ୟ ଓଡ଼ିଶାର କଳା, ସଂସ୍କୃତି ଓ ସାହିତ୍ୟକୁ ଅଗ୍ରାଧିକାର ଦେଉଥିବାରୁ ପତ୍ରିକା ଦୀର୍ଘଜୀବି ହେବ ସେ ବୋଲି ଆଶା ପୋଷଣ କରିଥିଲେ।
କାଦମ୍ବିନୀ ଜରିଆରେ ବିଭିନ୍ନ କ୍ଷେତ୍ରର ବ୍ୟକ୍ତିବିଶେଷମାନେ ଏକାଠି ହୋଇପାରୁଛନ୍ତି। କାଦମ୍ବିନୀର ଏଭଳି ପ୍ରୟାସ ସ୍ୱାଗତଯୋଗ୍ୟ ବୋଲି ଓଡ଼ିଶୀ ନୃତ୍ୟଗୁରୁ ଶ୍ରୀ ମହାପାତ୍ର କହିଥିଲେ। ସ୍ୱାଗତ ଭାଷଣ ଦେବା ସହ ଶ୍ରୀ ସାମନ୍ତ ଅତିଥିମାନଙ୍କୁ ସମ୍ବର୍ଦ୍ଧିତ କରିଥିଲେ। ଶିଶୁ କଳାକାର ଐଶ୍ୱର୍ଯ୍ୟା ମିଶ୍ରଙ୍କୁ ମଧ୍ୟ ଏହି ଅବସରରେ ସମ୍ବର୍ଦ୍ଧିତ କରାଯାଇଥିଲା। କାଦମ୍ବିନୀ ଓ କୁନିକଥାର ସମ୍ପାଦିକା ଡ. ଇତି ସାମନ୍ତ କାର୍ଯ୍ୟକ୍ରମ ପରିଚାଳନା କରିବା ସହ ଧନ୍ୟବାଦ ଅର୍ପଣ କରିଥିଲେ।
