ଲଘୁଚାପ ପ୍ରଭାବରେ ଓଡ଼ିଶା ପଶ୍ଚିମବଙ୍ଗ ସୀମାନ୍ତ ଦୀଘା ନିକଟରେ ଅଶାନ୍ତ ରହିଛି ସମୁଦ୍ର, ଉଠୁଛି ବଡ଼ ବଡ଼ ଜୁଆର
ଭୁବନେଶ୍ୱର(କେନ୍ୟୁଜ୍): ଲଘୁଚାପ ପ୍ରଭାବରେ ସମୁଦ୍ର ଅଶାନ୍ତ ହୋଇ ପଡିଛି । ବଡ଼ ବଡ଼ ଜୁଆର ଉଠୁଛି । ଓଡ଼ିଶା ପଶ୍ଚିମବଙ୍ଗ ସୀମାନ୍ତ ଦୀଘା ନିକଟରେ ଅଶାନ୍ତ ରହିଛି ସମୁଦ୍ର । ମାଡ଼ି ଆସିଛି ବଡ଼ ବଡ଼ ଜୁଆର । ପାଖାପାଖି ୧୦ ଫୁଟ୍ ଉଚ୍ଚର ଜୁଆର ଉଠୁଛି । ରାସ୍ତା ଉପରକୁ ମାଡ଼ି ଆସିଛି ସମୁଦ୍ର ପାଣି । ଗତକାଲି ପୂର୍ଣ୍ଣିମା ଥିଲା । ଆଜି ଅବପାତ ପ୍ରଭାବରେ ସମୁଦ୍ର ଅଶାନ୍ତ ହୋଇ ପଡିଛି । ସେପଟେ ପର୍ଯ୍ୟଟକଙ୍କ ସତର୍କ କରାଉଛି ପ୍ରଶାସନ । ଡାକବାଜି ଯନ୍ତ୍ର ଜରିଆରେ ପଶ୍ଚିମବଙ୍ଗ ପୋଲିସ୍ ପକ୍ଷରୁ ସଚେତନ କରାଯାଉଛି ।
ସୂଚନା ଥାଉକି, ବଙ୍ଗୋପସାଗରରେ ସୃଷ୍ଟି ହେଲା ଅବପାତ । େଓ୍ଵଲ୍ ମାର୍କଡ ଲୋ ପ୍ରେସର ଘନୀଭୂତ ହୋଇ ଆଜି ଡିପ୍ରେସନରେ ପରିଣତ ହୋଇଛି । ଦକ୍ଷିଣ ଉପକୂଳ ଓଡ଼ିଶା ଓ ପାର୍ଶ୍ୱବର୍ତ୍ତୀ ଅଞ୍ଚଳ ଉପରେ ସକ୍ରିୟ ରହିଛି ଅବପାତ । ଏବେ ଗୋପାଳପୁରଠାରୁ ୨୦ କିଲୋମିଟର ଉତ୍ତର-ପଶ୍ଚିମ ଦିଗରେ କେନ୍ଦ୍ରୀଭୂତ ରହିଛି । ପଶ୍ଚିମ-ଉତ୍ତର ପଶ୍ଚିମ ଦିଗରେ ଗତି କରୁଛି ଡିପ୍ରେସନ୍। ଆସନ୍ତା ୨୪ ଘଣ୍ଟାରେ ଦକ୍ଷିଣ ଓଡ଼ିଶା ଓ ଦକ୍ଷିଣ ଛତିଶଗଡ଼ ଆଡେ ଅଗ୍ରସର ହେବ । ପରେ ଧୀରେ ଧୀରେ ଦୁର୍ବଳ ହେବ ଅବପାତ । ଅବପାତ ପ୍ରଭାବରେ ଆଜି ରାଜ୍ୟରେ ବିସ୍ତତି ବର୍ଷା ଜାରି ରହିଛି।
ପ୍ରବଳରୁ ଅତି ପ୍ରବଳ ବର୍ଷା ପାଇଁ ୮ ଜିଲ୍ଲାକୁ ଅରେଞ୍ଜ ୱାର୍ଣ୍ଣିଂ ଜାରି କରାଯାଇଛି । ୧୬ ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି କରାଯାଇଛି। ଅବପାତ ପ୍ରଭାବରେ ଘଣ୍ଟାପ୍ରତି ୪୫ରୁ ୫୫ କିଲୋମିଟର ବେଗରେ ପବନ ବହିପାରେ । ଅଶାନ୍ତ ରହିଛି ସମୁଦ୍ର । ଆସନ୍ତାକାଲି ଯାଏ ମତ୍ସ୍ୟଜୀବୀଙ୍କୁ ସମୁଦ୍ର ଯିବାକୁ ବାରଣ କରାଯାଇଛି । ସମସ୍ତ ବନ୍ଦର ପାଇଁ ୩ ନମ୍ବର ବିପଦ ସଙ୍କେତ ଦିଆଯାଇଛି। ଆସନ୍ତା ୧୬ରୁ ୨୦ ତାରିଖ ଭିତରେ ଆଉ ଏକ ଲଘୁଚାପ ସମ୍ଭାବନା ଥିବା ପାଣିପାଗ କେନ୍ଦ୍ର ପକ୍ଷରୁ ସୂଚନା ଦିଆଯାଇଛି।
