୪୦ ମିନିଟ ଧରି ବାବୁସାନଙ୍କୁ ଖାରାବେଳନଗର ପୋଲିସର ପଚରାଉଚରା
ଭୁବନେଶ୍ବର(କେନ୍ୟୁଜ୍): ବାବୁସାନଙ୍କୁ ଖାରାବେଳନଗର ପୋଲିସର ପଚରାଉଚରା । ଚେନ୍ନାଇରୁ ଫେରିବାର ୪ ଦିନ ପରେ ଥାନାରେ ହାଜର ହୋଇଥିଲେ ବାବୁସାନ । ଆଜି ତାଙ୍କ ଜନ୍ମଦିନରେ ପାରିବାରିକ ବିବାଦ ନେଇ ବୟାନ ରେକର୍ଡ କରିଛି ପୋଲିସ । ପାଖାପାଖି ୪୦ ମିନିଟ ଧରି ତାଙ୍କୁ ପଚରଉଚରା କରିଥିଲେ ଖାରବେଳନଗର ଥାନା ପୋଲିସ । ପଚରାଉଚରା ସମୟରେ ମାଆ ଅପରାଜିତା ମହାନ୍ତି ଓ ସମ୍ପର୍କୀୟ ମାମୁ ରବି ମିଶ୍ର ଉପସ୍ଥିତ ଥିଲେ । ଦୁଇଟି ମାମଲାରେ ତାଙ୍କୁ ପୋଲିସ ଅନେକ କଥା ପଚାରିଛି ।
୨୩ ତାରିଖ ସକାଳେ କଣ ଘଟିଥିଲା ?
ପ୍ରକୃତିଙ୍କ ସହ କୁଆଡ଼େ ବାହାରିଥିଲେ ?
କେମିତି ଓ କେଉଁ ପରିସ୍ଥିତିରେ ସେଠାରେ ପହଞ୍ଚିଥିଲେ ତୃପ୍ତି ?
ଝଗଡ଼ା କାହିଁକି ହୋଇଥିଲା ?
ସ୍ୱାମୀ-ସ୍ତ୍ରୀଙ୍କ ଝଗଡ଼ା ଭିତରେ ପ୍ରକୃତିଙ୍କ ଭୂମିକା କଣ ଥିଲା ?
ଗାଡ଼ିରେ ଆଉ କିଏ ସବୁ ଥିଲେ ?
ଭିଡିଓ ସୁଟିଂ କରି କିଏ କରିଥିଲା ଭାଇରାଲ୍ ?
ପ୍ରକୃତିଙ୍କ ସହ କେତେ ଦିନର ସମ୍ପର୍କ ?
ସମ୍ପର୍କ କେବଳ ବନ୍ଧୁତାରେ ସୀମିତ ଥିଲା ନା ଆଉ କିଛି ଥିଲା ?
ତୃପ୍ତି ଆଣିଥିବା ଅଭିଯୋଗର ସତ୍ୟତା କଣ ?
ମାନସିକ ନିର୍ଯାତନା ଦେଉଥିଲେ କି ?
ତାଙ୍କୁ ବ୍ଲାକମେଲ୍ କରୁଥିଲେ କି ପ୍ରକୃତି ?
ଦୁହେଁ ଲିଭ୍ ଇନ୍ରେ ରହୁଥିଲେ କି ?
ନିଶା ସେବନ କରୁଥିଲେ ନା ନାହିଁ ?
ପତ୍ନୀଙ୍କ ବିରୋଧ ସତ୍ତ୍ୱେ କାହିଁକି ପ୍ରକୃତିଙ୍କ ସହ ମିଳାମିଶା କରୁଥିଲେ ?
ଏମିତି ଅନେକ ପ୍ରଶ୍ନର ଉତ୍ତର ବାବୁସାନଙ୍କ ପାଖରୁ ଜାଣିଛି ପୋଲିସ । ସେ ପଚରାଉଚରାରେ ସମ୍ପୂର୍ଣ୍ଣ ସହଯୋଗ କରିଥିବା ଖାରବେଳନଗର ଥାନା ଆଇଆଇସି କହିଛନ୍ତି । ସେ କହିଛନ୍ତି, ଏହା ଏକ ପାରିବାରିକ ସମସ୍ୟା । ସେମାନେ ଏକ ପ୍ରତିଷ୍ଠିତ ଫ୍ୟାମିଲିର । ସେମାନେ ଜାଣିଛନ୍ତି ପରିବାର କେଉଁଟା ମଙ୍ଗଳ ହେବ । କେସର ତଦନ୍ତ ଚାଲିଛି । ମାମଲାର ସବୁ ଦିଗକୁ ଅନୁଧ୍ୟାନ ପରେ ଆଇନ ଅନୁସାରେ ପୋଲିସ ପଦକ୍ଷେପ ନେବ ବୋଲି ଖାରବେଳନଗର ଥାନା ଅଧିକାରୀ କହିଛନ୍ତି ।
